Республика кунӗнче Ҫӗнӗ Шупашкарта Раҫҫейри паллӑ юрӑҫсем сцена ҫине тухассине пӗлтернӗччӗ. Ун чухне камсем килессине каламанччӗ.
Вӑрттӑнлӑха уҫнӑ. Спутник хула ҫыннисене "Краски" ушкӑн савӑнтарӗ. Вӑл каҫхине Атӑл хӗрринчи лапамра юрлӗ.
Палӑртмалла: 2000 ҫулсен пуҫламӑшӗнче анлӑ сарӑлнӑ ушкӑнра ун чухнехи юрӑҫсенчен нихӑшӗ те юлман. Пурте - ҫӗнӗ ҫынсем.
Паян ирхине Ҫӗнӗ Шупашкарта Женя Крутова урамӗнче 16-мӗш ҫуртра 3-мӗш хутра пушар тухнӑ. Ҫав вӑхӑтра вара кил хуҫи ним сисмесӗр ҫывӑрнӑ.
Тӗтӗм шӑршине кӳршисем сиснӗ те пушарнӑйсене чӗннӗ. Ҫӑлавҫӑсем килсен кил хуҫине ҫунакан хваттертен илсе тухнӑ. Ӑна, сӗрӗмпе наркӑмӑшланнӑскере, пульницӑна илсе ҫитернӗ.
Пушар вӑхӑтӗнче ҫуртран 10 ҫынна урама кӑларнӑ. Юрать, вӗсенчен нихӑшӗ те шар курман.
Полици капитанӗ Сергей Ежов Ҫӗнӗ Шупашкар ҫывӑхӗнче Атӑл ҫинче катерпа патрульте пулнӑ. Ӑнсӑртран вӑл пулӑшу ыйтса кӑшкӑрнине илтнӗ.
Пӗр арҫын путма пуҫланӑ иккен, шывран тухаймасть. Сергей Ежов ӗҫтешӗпе Максим Атласкинпа ӑна шывран туртса кӑларнӑ та катер ҫине хунӑ. Ӑна шӑнӑр туртса лартнӑ, хӑй тӑнне ҫухатман-ха.
Путма пуҫланӑ арҫын 30 ҫулта, вӑл – Самара ҫынни. Палӑртмалла: Сергей Ежов полици тытӑмӗнче 30 ҫула яхӑн ӗҫлесе 3 ҫынна путасран ҫӑлнӑ.
Ҫак хӗрача – чӑн-чӑн маттур. Вӑл икӗ экзаменра 200 балл пухнӑ. Сӑмах Ҫӗнӗ Шупашкарти Виктория Котусенко пирки пырать. Вӑл химипе тата вырӑс чӗлхипе пулнӑ экзаменсенче ҫавӑн чухлӗ балл пухнӑ.
Республикипе илес тӗк, вырӑс чӗлхи экзаменӗнче 36 ҫамрӑк 100 балл пухнӑ. Вӗсен йышӗнче Шупашкартан, Ҫӗнӗ Шупашкартан, Канашран, Йӗпреҫрен, Вӑрмартан, Патӗрьелтен пур.
Республика кунӗнче Ҫӗнӗ Шупашкар сцени ҫинче Раҫҫей эстрада ҫӑлтӑрӗ юрлӗ. Кун пирки хула администрацийӗн пуҫлӑхӗ Дмитрий Пулатов пӗлтернӗ.
Ҫавӑн пекех хула ҫыннисене "Раҫҫей ҫӑлкуҫӗсем" фестивале, "Виҫӗ хӗвел" этно-фестивале хутшӑнакан пултарулӑх ушкӑнӗсем савӑнтарӗҫ. Уяв ташӑ каҫӗпе тата фейерверкпа вӗҫленӗ.
Сӑмах май, Химик кунӗнче Ҫӗнӗ Шупашкара "Уматурман" килнӗ. Кам килессине ун чухне уявчченех вӑрттӑнлӑхра тытнӑ. Хальхинче те хӑш юрӑҫ килессине пӗлтермен.
Ҫӗнӗ Шупашкарти арҫын кредиткӑпа усӑ курман, анчах унтан унӑн укҫи ҫухалнӑ. 33 пин тенкӗпе такам усӑ курнӑ.
Йӗрке хуралҫисем ҫав ҫынна тупма пулӑшнӑ. Ака уйӑхӗнче вӑл йӑлара усӑ курмалли техника туяннӑ. Уншӑн тӳленӗ чухне телефонӗнче тӗнче тетелӗ тытман та вӑл пӗлӗшне пулӑшма ыйтнӑ. Лешӗ кредиткӑна хӑйӗн телефонӗ ҫине ҫирӗплетнӗ, анчах каялла илмен. Хайхискер, унччен те вӑрланӑшӑн судпа айӑпланнӑ 20 ҫулти каччӑ, ҫав карттӑпа 2 уйӑх усӑ курнӑ: лавккара, кафере, хупахра. Ҫапла вӑл 33 пин тенкӗ тӑкакланӑ.
Шкултан вӗренсе тухакансем патшалӑхӑн пӗрлехи экзаменне тытаҫҫӗ. Камсем 100 балл пухнисем паллӑ.
Химипе 15 ҫамрӑк 100 бала тивӗҫнӗ. Вӗсем: Семен Измуков (Шӑмӑршӑ шкулӗ), Анна Воробьева (Канашри 6-мӗш), Ксения Гордеева (Шупашкарти 2-мӗш гимнази), Егор Яковлев (Шупашкарти 1-мӗш гимнази), Регина Моткина (Шупашкарти 44-мӗш лицей), Екатерина Романова, Ангелина Скобелева, Данила Гаврилов, Ольга Алексеева, Ольга Баканова (Шупакшарти 2-мӗш лицей), Лейла Мурашкина, Дарья Горшкова, Мария Горшкова, Мария Александрова, Виктория Котусенко (Ҫӗнӗ Шупашкарти 18-мӗш лицей).
Вырӑс литературипа вара Шупашкарти 2-мӗш гимназии вӗренекенӗ Яна Семенова 100 балл пухнӑ.
Ӗнер, ҫӗртме уйӑхӗн 5-мӗшӗнче, 12 сехет те 20 минутра ҫӑлав службине шӑнкӑрав ҫитнӗ: Ҫӗнӗ Шупашкарти Промышленноҫ урамӗнче килсӗр-ҫуртсӑр йытӑ ҫӑла ӳкнӗ.
Ҫӑлавҫӑсем вырӑна хӑвӑртах ҫитнӗ. Ҫекӗлпе усӑ курса вӗсем ҫӑла ӳкнӗ ҫапкаланчӑк йытта туртса кӑларнӑ. Паллах, йытӑ савӑннӑ. Ҫакна вӑл хӳрипе хаваслӑн вылятса палӑртнӑ. Ҫапла тав тунӑ ӗнтӗ вӑл ҫӑлавҫӑсене. Кайран вӑл хӑвӑрт кӑна куҫ умӗнчен ҫухалнӑ.
Ӗнер, ҫӗртме уйӑхӗн 1-мӗшӗнче, 21 сехет иртсен Ҫӗнӗ Шупашкарта арҫын ӑнсӑртран Атӑла кӗрсе ӳкнӗ. Юрать, ҫывӑхра шӑпах полицейскисем тата Рыбохрана инспекторӗсем ишсе иртнӗ. Вӗсем ӑна пулӑшнӑ.
Унта Атӑл хӗрринче ҫын пухӑнакан вырӑн пур. Шывран вӑл 5-6 метр ҫӳллӗшӗнче. Арҫын ҫавӑнтан ӳкнӗ. Ҫакна курнӑ ҫынсем каланӑ тӑрӑх, вӑл питӗ ӳсӗр пулнӑ.
Катерпа пынӑ полицейски тата патшалӑх инспекторӗ ҫав арҫынна ҫыран хӗррине илсе тухса тухтӑрсен аллине панӑ.
Ҫӗнӗ Шупашкарта пӗр хӗрарӑм машина ҫине хӑпарса кайнӑ. Автомобиль хулари Никольски микрорайонта ларнӑ.
Асӑннӑ видео тӑрӑх хакласан, малтан вӑл автомобиль тӗкӗрне ватнӑ, унтан машина капочӗ ҫине улӑхнӑ, ун ҫинче сикнӗ, машина чӳречине ватнӑ.
Пӑтӑрмаха курнисем хӗрарӑма лӑпланма ыйтнӑ, вӑл вӗсене хӑйӗн машинипе кирек мӗн тума пултарнине пӗлтернӗ.
Хӗрарӑм хӑйӗн тарӑхӑвне ҫапла сирнине унӑн тусӗ сӑнаса тӑнӑ.
Пӑтӑрмаха курнисем шухӑшланӑ тӑрӑх, хӗрарӑм тепӗр хӗрпе явӑҫса кайнӑ каччине тарӑхнипе ҫапла тавӑрас тесе пултарнӑ. Машинӑна кӑштахран ҫамрӑк арҫын кӗрсе ларнӑ, машинӑна вӑл хускатса кайнӑ.
+22.3 °C